دوركدليل المحل
كل اللي يحتاجه المحل والكاشير عشان يشغّل «دورك» في 5 دقايق.
1. أول مرة (صاحب المحل)
- افتح dorak.org/staff وادخل بالبريد وكلمة المرور اللي وصلتك منا.
- انزل تحت لـ«إعدادات المحل»:
- اكتب اسم المحل، واختر التصميم واللون المناسب لديكورك، وارفع شعارك.
- حط رابط تقييم المحل في قوقل (اختياري): يطلع للعميل اللي يعطيك 5 نجوم عشان يقيمك في قوقل ماب.
- اضغط «حفظ الاسم والتصميم».
- اضغط «طباعة ستاند الـ QR»، واختر المقاس: A5 للكاونتر أو A6 للطاولات، واطبعه أو احفظه PDF وودّه للمطبعة.
- حط الستاند جنب الكاشير في مكان واضح للعميل.
رابط تقييم قوقل من وين؟ من جوالك: قوقل ماب ← صورتك فوق ← «نشاطك التجاري» ← «طلب المراجعات» ← انسخ الرابط.
2. كل يوم
- جهاز الكاشير: افتح dorak.org/staff (يبقى مسجّل دخول، ما يحتاج تدخل كل يوم).
- شاشة العرض (اختياري): افتح رابط «شاشة العرض» من الإعدادات على تلفزيون أو تابلت، يطلع فيه الطلبات الجاهزة بخط كبير.
- المطبخ أو الباريستا (اختياري): افتح «إدخال سريع» على جهاز ثاني، ويقدرون يضغطون «طلب جاهز ✓» من مكانهم.
- تقدر تفتح نفس الحساب على أكثر من جهاز بنفس الوقت، وكلها تتحدث مع بعض.
3. تسجيل الطلب
- الرقم يطلع تلقائيًا تحت «الرقم التالي». إذا رقم الطلب في الكاشير غيره، اكتبه من الأزرار (مسح و⌫ للتصحيح).
- اضغط «إضافة الطلب». ينضاف تحت «قيد التحضير».
- أول ما يجهز اضغط «جاهز». جوال العميل يرن ويهتز، ورقمه يطلع على شاشة العرض.
- لما يستلم العميل اضغط «تم الاستلام». ينحفظ في الإحصائيات، ويطلع للعميل تقييم بالنجوم.
لا تنسى «تم الاستلام». بدونها ما ينحسب وقت التحضير، وما يطلع التقييم للعميل.
4. الواتساب (باقة الواتساب)
- العميل يقدر يكتب جواله في صفحة الطلب. الطلب يطلع عندك وجنبه «واتساب ✓».
- لما يجهز الطلب يطلع زر «إرسال واتساب». اضغطه وينفتح واتساب برسالة جاهزة، واضغط إرسال.
- العملاء اللي وافقوا على العروض تلقاهم في «العملاء»، وتقدر تصدّر أرقامهم للتسويق.
5. التقارير والتقييم
- «الإحصائيات» فوق: عدد الطلبات، ومتوسط وقت التحضير، وأوقات الذروة، ونسبة العملاء اللي مسحوا الباركود، مقارنة بالفترة اللي قبلها.
- تحت في نفس الصفحة «تقييم العملاء»: متوسط النجوم، ووش اللي ما عجب العملاء، وآخر الملاحظات مع رقم الطلب.
- شيك على الملاحظات كل أسبوع، وأكثر سبب يتكرر هو أول شي تحسنه.
6. وش يقول الكاشير للعميل
«امسح الباركود اللي هنا واكتب رقم طلبك، وخلّ الصفحة مفتوحة. أول ما يجهز يرن جوالك.»
- إذا العميل جديد، ساعده أول مرة: يمسح بكاميرا الجوال، يكتب الرقم، يضغط «تابع».
- إذا عنده آيفون ذكّره: لا يقفل الصفحة ولا يحط الجوال على الصامت.
7. إذا علّق شي
جوال العميل ما رن
- تأكد إن العميل ضغط «تابع» بعد ما كتب الرقم، وإن الرقم نفس رقم الطلب عندك.
- الجوال على الصامت أو «عدم الإزعاج»؟ يرفع الصوت.
- العميل قفل الصفحة؟ إذا رجع لها ترن له. وفي الآيفون إذا ما رنت يلمس الشاشة مرة.
الباركود يفتح صفحة خطأ (404)
اطبع الستاند من جديد من «طباعة ستاند الـ QR». لا تستخدم صورة ستاند قديمة.
الطلبات ما تتحدث أو الأزرار ما تستجيب
- تأكد من الإنترنت في الجهاز.
- حدّث الصفحة: Ctrl + Shift + R بالكمبيوتر، أو اسحب الصفحة لتحت بالجوال.
- إذا ما زال، سجّل خروج وادخل من جديد.
زر «إضافة الطلب» مقفل وفيه شريط أحمر «انتهى اشتراك المحل»
كلمنا للتجديد، وبعدها يرجع كل شي يشتغل على طول. طلباتك وبياناتك محفوظة.
نسيت كلمة المرور
في صفحة الدخول اكتب بريدك واضغط «نسيت كلمة المرور؟»، ويوصلك رابط على الإيميل. شيك الـ Spam إذا ما لقيته.
شاشة العرض تطفي
من إعدادات التلفزيون أو التابلت ألغِ وضع السكون أو توفير الطاقة.
سجّلت طلب بالغلط
اضغط عليه «جاهز» ثم «تم الاستلام» على طول عشان يختفي من القائمة.
8. التواصل والدعم
لأي مشكلة أو سؤال كلمنا على الواتساب: 0567470878، أو الإيميل: info@dorak.org. ويساعدنا لو أرسلت صورة الشاشة مع المشكلة.